यस बर्ष कर्णालीको बिकास बजेट धेरै खर्च हुन्छ : राजनितिक सल्लाहकार शर्मा

रेडियो राप्ती, समाचार डेस्क,
सल्यान ७ असोज ।
कर्णाली प्रदेशका मुख्यमन्त्री महेन्द्र बहादुर शाहीका राजनितिक सल्लाहकार भिम प्रकाश शर्माले कर्णाली प्रदेश सरकारले यस बर्ष बिकास बजेट धेरै खर्च गर्ने दावी गर्नुभएको छ । बिगतको बर्षमा बिभिन्न ऐन कानुन निर्माण गर्नुपर्ने लगाएतका बिभिन्न कारणले बिकास बजेट कम खर्च भएको बताउदैँ उहाँले यस बर्ष उल्लेख्य मात्रामा बिकास बजेट खर्च हुने बताउनुभएको हो ।

सोमबार सल्यानको सदरमुकाम खलंगामा पत्रकारहरुसँगको भेटघाटका क्रममा उहाँले यस्तो बताउनु भएको हो । प्रदेश सरकारको लक्ष्य अनुसार नै यो बर्ष बिकास बजेट खर्च हुन्छ, सबै जिल्लाहरुमा प्रदेश मातहतका संरचनाहरु निर्माण भएका छन् यसले गर्दा प्रदेश सरकारलाई काम गर्न सजिलो हुन्छ उहाँले भन्नुभयो । उहाँले प्रदेशमा दरबन्दी अनुसारको कर्मचारी नहुदाँ समस्या भएको बताउनुभयो ।

प्रदेशमा कर्मचारी कम छन्, प्राबिधिक धार तर्फका कर्मचारीहरु करारमा भर्ना गरेर भएपनि बिकास निर्माणका कामहरु सञ्चालन गर्छौ उहाँले भन्नुभयो गत बर्षको भन्दा यो बर्ष पुजीँगत खर्च धेरै हुन्छ । उहाँले प्रदेश सरकारले पूर्बाधार बिकासलाई प्राथामिकता दिएको पनि बताउनुभयो ।

शर्माले कर्णाली प्रदेश समृद्ध कर्णाली निर्माणको अभियानमा लागेको बताउनुभयो । उहाँले कर्णालीमा रहेको बालबिबाह, कुरिती, कुसंस्कार आदीको न्यूनिकरणमा सरकारको जोड रहेको बताउनुभयो । यसका लागी ‘बैँक खाता छोरीको, सुरक्षा जीवन भरीको’ कार्यक्रममा प्रदेश सरकारले सञ्चालन गरेको उहाँले बताउनुभयो ।

उहाँले संघिय ऐन निर्माण नहुदाँ प्रदेश सरकारलाई ऐन कानुन निर्माणमा केही समस्या थपेको बताउनुभयो ।